वणवण जगभर
माणसाची भटकंती,
सुख शोधसि नजर
विचारात पडे अंती ||१||
सर्व काही मिळाल्याने
होई सुखी तनमन,
अशा भ्रमात सदैव
रोज कुंठीतो जीवन ||२||
परि मिळेना शांतता
इच्छा डोंगर वाढतो,
पैशासाठी-सुखापायी
ताण घेऊन धावतो ||३||
स्वतःसाठी नसे वेळ
कष्ट उपसतो फार,
सुख शोधावे अंतरी
डोकावून आरपार ||४||
सुख दिसेना डोळ्यांना
बघे श्रीमंती स्वप्नात,
आयुष्यात अती लोभ
समाधान निर्जीवात ||५||
सुख कशास म्हणती?
प्रश्न सोडवूया आधी,
स्वतःहून मानण्यात
बघ गोष्ट आहे साधी ||६||
©®मनिषा विसपुते
